काँकरभिट्टा, ५ बैशाख । पूर्वी नाका काँकरभिट्टामा विदेशी पर्यटक र सर्वसाधारण यात्रुहरुको सहज आवात जावतलाई मध्येनजर गर्दै मेची भन्सार कार्यालयले आजदेखि उत्तरपटिको ढोका बन्द गरेर सोझै एशियन हाइवेको बाटो खुल्ला गरेको छ ।

मेची भन्सार कार्यालयका प्रमुख राजेन्द्रप्रसाद चुडालले भारत लगायत विदेशबाट आउने पर्यटक र सर्वसाधारण यात्रुहरुलाई आवात जावतमा समस्या नहोस् भनेर उत्तरपटिको गेट बन्द गरेर सिधै एशियन हाइवेको बाटो खुल्ला गरिएको जानकारी दिए ।

गाडी लिएर आएका पर्यटक र यात्रुहरुलाई भन्सार गेटमा झनझट र भेरै समस्या भएपछि मेचीनगर नगरपालिका, यहाँ सबै राजनीति दलहरु, यातायात व्यवसायी, होटल व्यवसायी, ट्राभल्स व्यवसायीले भन्सारलाई आवगमन सहज गर्न अनुरोध गरेको थियो ।

आज कोशी प्रदेशका सांसद एवम् नेपाली कांग्रेस संसदीय दलका प्रमुख सचेतक गोपाल तामाङ, पूर्व सांसद श्रीप्रसाद मैनाली, मेचीनगर नगरपालिकाका प्रमुख गोपालचन्द्र बुढाथोकी, ६ नं।वडाका वडाध्यक्ष ललितबहादुर तामाङ लगायतले निरीक्षण गरेका थिए ।

नगरप्रमुख बुढाथोकीले सर्वसाधारणहरु पारीबाट आउदा वा जाँदा नाकामा धेरै झनझट भएकाले व्यवस्थित गर्न आग्रह गरे अनुसार भन्सार कार्यालयले आजदेखि आवात–जावतमा सहजता ल्याएको बताए ।

यसअघि पारिबाट आएका विदेशी गाडी, पर्यटक र यात्रुहरुलाई भन्सार गेट उत्तरबाट घुमाएर बसटर्मिनल छेउ निकालेर एशियन हाइवेसँग जोडिन्थ्यो । सोझै गाडी र यात्रु एशियन हाइवे बाटोबाट जान पाउँदैन थिए ।

यात्रुशाखाबाट गाडीको भन्सार गरेपछि नेपाल प्रहरी, सशस्त्र प्रहरी, भन्सारका कर्मचारीले स्टीकरसहितको सुरक्षा जाँच गरेपछि सिधै एशियन हाइवेको बाटो प्रयोग गर्न सकिने छ ।